എന്തുചെയ്യും, ഇമ്മാതിരി അന്തക്കേടുകളെ?

ആലോചിച്ചാൽ അറ്റം കിട്ടാത്ത അതിസങ്കീർണതകൾ ഉൾചേർന്നു കിടക്കുന്ന നിഗൂഢ ജന്തുവാണ്, ആര്? മനുഷ്യൻ! അവൻ്റെ ശരീരവും മനസ്സും നാലുമൂലയിലും വരവരച്ച് അകത്തൊതുക്കുക അസാധ്യമാണ്. മനുഷ്യന്റെ മനസ്സിൽ ഉരുവം കൊള്ളുന്ന ചിന്തകളും സ്വപ്നങ്ങളും മോഹങ്ങളും അഭിനിവേശങ്ങളും ആർക്ക് കണ്ടുപിടിക്കാനാകും, ആർക്ക് തിട്ടപ്പെടുത്താനാകും. ഇതര ജന്തുക്കളിൽ നിന്ന് തെന്നിമാറി വിശിഷ്ടമായ മാനവ-മാനക വഴിയിലൂടെ പോകുമ്പോഴും അതിവിചിത്രമായ ആഗ്രഹങ്ങളും മനച്ചാപല്യങ്ങളും കൊണ്ടുനടക്കുന്നവരാണ് മനുഷ്യർ, ചിലരെങ്കിലും.

നിങ്ങൾക്ക് ഒരു മൊട്ടയെയും ഒരു മൊട്ടച്ചിയേയും കാണിച്ചു തരട്ടെ. സംഗതി അവർ എങ്ങനെയാണ് ഈ നിലക്ക് ആയി മാറുന്നത് എന്നറിയോ? മുടി വളരാഞ്ഞിട്ടോ എന്തെങ്കിലും രോഗങ്ങൾ ഉള്ളതുകൊണ്ടോ അല്ല. മറിച്ച് അവർ സ്വന്തം മുടിയും പുരികവും കൺപീലികളും പിടിച്ചു പറിച്ചു കളഞ്ഞു കൊണ്ടേയിരിക്കുന്നു. എന്തിന്? അതെ അതൊരു രോഗമാണ്. പേരു കേൾക്കണോ? Trichotillomania

ഇനി വേറൊന്ന് ചോദിക്കട്ടെ. നിങ്ങൾ പൈക എന്ന് കേട്ടിട്ടുണ്ടോ? അതായത് Pica? കുട്ടികളെന്നോ വല്യാൾ എന്നോ വ്യത്യാസമില്ലാതെ കണ്ട കാടും കടലാസും മണ്ണും ചെളിയും പെയ്ൻ്റും മുടിയും വായിലിട്ട് ചവച്ച് തിന്നുന്ന ഒരുമാതിരി സൂക്കേടാണ്. ഇതിൽ മണ്ണു തീറ്റയെ വിളിക്കുന്ന അരുമപ്പേരാണ് geophagy. എന്നാൽ ചിലർ കണ്ടമാനം തിന്നുക ഐസാണ്, മുഖ്യാഹാരം ഐസ് ആയതു പോലെ. ദണ്ണത്തിന് പോരിശയാക്കപ്പെട്ട ഒരു പേരുമുണ്ട് :pagophagia. എന്നാൽ കേട്ടോളൂ, മുടി തിന്നുന്ന രോഗം trichophagia ആണ്. നിങ്ങൾ ഇതെന്തറിഞ്ഞു. മനുഷ്യന് എന്തെല്ലാം തരം നിഗൂഢ വൈകൃതങ്ങളും ആന്തരിക ചാപല്യങ്ങളുമാണുള്ളത്. ഞെട്ടലുളവാക്കുന്ന അത്തരം ചില ശീലക്കേടുകളിലൂടെ നമുക്കൊന്ന് നടന്നു നോക്കാം:- എന്തിനാണെന്ന് പിറകെ പറയാം.

1. Zoanthropy 

ആള് ആള് തന്നെയാണ്. പക്ഷേ കക്ഷിക്ക് തോന്നുകയാണ് ഞാനൊരു മൃഗമാണെന്ന്. വളരെ റെയറായ ഒരു സൈക്കോ തകരാറാണിത്. മൃഗങ്ങളെ പോലെ ഒച്ചവെക്കുകയും, അവയെ അനുകരിച്ച് ശരീര ചലനം ഉണ്ടാക്കുകയും, അസ്ഥിരമായ മാനസികാവസ്ഥ കൊണ്ടു നടക്കുകയും ചെയ്യുന്ന ഒരു കേടാണിത്. ഇനി പറയാൻ പോകുന്ന മൂന്നെണ്ണം ഈ പറഞ്ഞതിന്റെ വകഭേദങ്ങളാണ്.

a. Lyncanthropy

താനൊരു ചെന്നായയായി മാറിയിരിക്കുന്നു എന്ന് മനസ്സുകൊണ്ട് ഉറച്ച് ആളുകളെ കടിച്ചും മാന്തി പറിച്ചും അത് പ്രകടിപ്പിക്കുകയും ജനങ്ങളിൽ നിന്നകന്ന് കാട്ടുജീവിതം നയിക്കാൻ ശ്രമിക്കുകയും ചെയ്യുന്ന വല്ലാത്തൊരു മാനസികരോഗമാണിത്.

b .Cynanthropy

താനൊരു നായയായി മാറിയിരിക്കുന്നു എന്ന് കരുതുകയും നായയെപ്പോലെ കുരക്കുകയും ഇഴയുകയും ചെയ്യുന്നു. നായയെപ്പോലുള്ള ഭാവഹാവാദികൾ പ്രകടിപ്പിക്കുന്നു. എല്ലാവരും സമ്മേളനം നടത്തുന്ന കാലമല്ലേ. ഈയടുത്ത് ഈ നായ മനുഷ്യന്മാർ ജർമ്മനിയിൽ ഒരു മീറ്റിംഗ് നടത്തിയിരുന്നു. അവർ എന്നിട്ട് കൂട്ടമായി നായയെപോലെ ഒച്ചവെച്ചു.

C . Boanthropy

ഗോപാല കുറുപ്പ് വെറും ഗോ കുറുപ്പായി മാറുന്ന വൈകൃതം. ആള് വിചാരിക്കുന്നത് ഞാനിപ്പോൾ ഒരൊന്നാന്തരം പശു / കാളയായി മാറിയിരിക്കുന്നു എന്നാണ്. പശുവിനെ പോലെ കരയുന്നു. പശുവിനെപ്പോലെ നടക്കാൻ നോക്കുന്നു, പശുവിനെ പോലെ പച്ചപ്പുല്ലും പച്ചിലകളും കടിച്ചു തിന്നുന്നു. പക്ഷേ ഇടക്കിടെ കഠിനമായ മാനസിക സമ്മർദ്ദവും വിഷാദവും പ്രകടിപ്പിക്കുന്നു.

2. Cotard's Syadrome/ Walking corpse Syadrome 

വൈകുന്നേരം ചായയും കടിയുമായി ചെന്നപ്പോൾ ആളിന് തോന്നുന്നു ഇതെന്തു പുതുമ - മരിച്ചയാൾക്കുണ്ടോ ആരെങ്കിലും ചായ തരുന്നു - ഞാനിതാ മരിച്ച് കഴിഞ്ഞില്ലേ - ഇത് അദൃപപ്പെട്ട ഒരു മനോവൈകല്യമാണ്. ചിലർ വിചാരിക്കുക ഞാൻ മരിച്ചു എന്നത് ശരി തന്നെ പക്ഷേ എൻ്റെ ജീവൻ പോയിട്ടില്ല; ഞാൻ അദൃശ്യാനന്ത സൂക്ഷ്മബോധിയായി ഇവിടെയെല്ലാം പാഞ്ഞുനടപ്പുണ്ട്. പക്ഷേ എനിക്കാഹാരം വേണ്ട, വെള്ളം വേണ്ട, ജീവിക്കുന്നവർക്കുള്ള ചാപല്യങ്ങളൊന്നും എനിക്കില്ല. എന്നെ ആരും കുടികൂടലിനും കല്യാണത്തിനും കരയോഗത്തിനും സാഹിത്യസമാജത്തിനും ഒന്നും അറിയാതെ വിളിച്ചേക്കല്ലേ, ഞാൻ മരിച്ചു കഴിഞ്ഞതല്ലേ. നല്ല കടുപ്പപ്പെട്ട ചികിത്സ മാത്രം ശരണം, അല്ലാതെന്തു പറയാനാ.

3. Capqras Delusion 

ഒരു ദിവസം നിങ്ങൾ അമ്മയെ കാണാൻ തറവാട്ടിൽ കയറി ചെന്നപ്പോഴുണ്ട് അമ്മ നിങ്ങളെ ആട്ടിപ്പായിക്കുന്നു. "ഇറങ്ങിപ്പോ കോയിന്ദാ" എന്നും പറഞ്ഞ്. നിങ്ങൾ ശരിക്ക് ഗോവിന്ദനല്ല; ഗോപാലനാണ്. അമ്മയുടെ മകനാണ്. ഈ നാല്പത്തെട്ട് വയസ്സിൽ നാൽപത്തിരണ്ട് കൊല്ലവും അമ്മയ്ക്കൊപ്പം ഒരു വീട്ടിൽ ഒന്നിച്ച് താമസിച്ചതാണ്. അമ്മക്കിപ്പോൾ തല തെറ്റിയിരിക്കുന്നു.

സ്വന്തം കുടുംബക്കാരെ, ഭാര്യയെ, ഭർത്താവിനെ അവരൊന്നുമല്ലാത്ത മറ്റേതോ ഒരു വ്യാജ മനുഷ്യനായി തോന്നുന്ന പിടുത്തം വിട്ട രോഗമാണ്. നല്ല മൂഡ് സ്റ്റെബിലൈസർ ഗുളികകൾ വിഴുങ്ങിപ്പിക്കുന്നതോടൊപ്പം, ഉഗ്രൻ സൈക്കോ ട്രീറ്റ്മെൻ്റ് കൂടി കൊടുക്കുകയല്ലാതെ നിവൃത്തിയില്ല . 1923-ൽ ഫ്രഞ്ച് സൈക്കോളജിസ്റ്റായ Joseph capqras ആണ് ആദ്യമായി ഇത് തിരിച്ചറിഞ്ഞത്. ആയതിനാൽ പേരും അദ്ദേഹത്തിൻ്റെ പിന്നാലെ.

4. Fregoli Delusion

മുകളിൽ പറഞ്ഞത് മൂക്കും ചിലപ്പോൾ. അന്നേരം ഒരാൾ മറ്റൊരാളായി എൻ്റെയടുത്തിതാ കള്ള വരവ് വന്നിരിക്കുന്നു എന്ന് മാത്രമല്ല - ഒരുപാട് ആളുകളായി ഈ ഒരുത്തൻ എന്നെ പിന്തുടർന്നുകൊണ്ടിരിക്കുകയാണ് എന്ന് തോന്നും. അതായത് നിങ്ങളുടെ സുഹൃത്തായിട്ടുള്ള ഒരാൾ ഒരു നേരം നിങ്ങളുടെ അനിയനായി / അളിയനായി / അയൽക്കാരനായി / അമ്മോശനായി മാറിമാറി വരുന്നു - അവരെല്ലാം തന്നെയാണ് ഇവൻ എന്ന് തോന്നുന്ന മൂച്ചിപ്പിരാന്ത്. കാണിക്കണം, ഒന്നാന്തരം മനോരോഗ വിദഗ്ധനെ.

5. Somato paraphrenia

നിങ്ങൾ ട്രെയിനിൽ യാത്ര ചെയ്യുന്നു. പെട്ടെന്ന് നിങ്ങളുടെ സഹയാത്രികൻ "കൈ മാറ്റെടോ" എന്നുപറഞ്ഞ് നിങ്ങളോട് ചൂടാവുന്നു. നോക്കുമ്പോൾ അത് അയാളുടെ കൈ തന്നെ ആണ്. അയാൾക്ക് തോന്നുന്നത് അയാളുടെ കൈ അയാളുടെതല്ല മറ്റൊരാളുടേതാണ് എന്നാണ്. ഒച്ചപ്പാട് ആയപ്പോൾ മറ്റൊരാൾ സജീവമായി. ഇത് ഇയാളുടെ സ്ഥിരം ഏർപ്പാടാണ്. മുമ്പൊരിക്കൽ എന്നോട് പറഞ്ഞു കാല് മാറ്റാൻ. സംഗതി കക്ഷിയുടെ കാൽ തന്നെയായിരുന്നു.

സ്വന്തം അവയവങ്ങൾ ഒന്നും തന്റേതല്ലെന്ന് തോന്നുക. യാത്ര കഴിഞ്ഞു വന്നാൽ ഹെൽമറ്റ് തലയിൽ തന്നെ വെച്ചാൽ നമുക്കുണ്ടാവില്ലെ ഒരു ഇണ്ടൽ. അത് എടുത്ത് മാറ്റിവെക്കുമ്പോഴില്ലേ ഒരു ആശ്വാസം. എന്നപോലെ അവയവങ്ങൾ അധികപ്പറ്റാണെന്നും അവ ഊരി വെക്കണമെന്നും തോന്നുന്ന പെർഫെക്റ്റ് പിരിലൂസ്. മരുന്നും തെറാപ്പിയും ഇട്ട് തലയുടെ കയറ് മുറുക്കുകയേ നിർവാഹമുള്ളൂ. ചിലപ്പോൾ ഇത് BlD ആയി

വഷളാവാറുണ്ട്. Body integrity dysphoria. അപ്പോൾ അന്യമായ ഈ അവയവങ്ങളെ വെച്ചുപൊറുപ്പിക്കുന്നതിന് പകരം കത്തിയെടുത്ത് കൊത്തിയെറിയാൻ തോന്നും. ( AHS- Alien hand Syndrome)

6. Reduplicative paramnesia

നേരത്തെ സ്വന്തം അവയവത്തെ ചൊല്ലിയായിരുന്നു പൊല്ലാപ്പെങ്കിൽ ഇപ്പോൾ സ്ഥലത്തെപ്പറ്റിയാണ് മനസ്സ് ഭ്രമപ്പെടുന്നത്. ആള് മരപ്പൊട്ടൻ കളി കളിച്ചിട്ട് കുടുംബക്കാർ പിടിച്ചു കോഴിക്കോട് മെഡിക്കൽ കോളേജിൽ എത്തിച്ചിരിക്കുകയാണ്. അപ്പോൾ പുള്ളി പുലമ്പുകയാണ് നമ്മളിങ്ങ് കോട്ടയം മെഡിക്കൽ കോളേജിൽ എത്തിയല്ലേ- തമാശയല്ല കാര്യമായും. ഒരു സ്ഥലത്തെ മറ്റൊരു സ്ഥലമായി തെറ്റി മനസ്സിലാക്കുന്ന തരക്കേട്.

7. Munchausen Syndrome:

 മറ്റുള്ളവരുടെ ശ്രദ്ധയും കരുതലും സിമ്പതിയും നേടിയെടുക്കാൻ വേണ്ടി ഒരാൾ അയാളെ തന്നെ ശാരീരികമായി അപകടപ്പെടുത്തുന്ന അപകടകരമായ രോഗം. ശരീരത്തെ സ്വയം പരിക്കേൽപ്പിക്കൽ, വിഷാംശങ്ങൾ കഴിക്കൽ, തുടരെത്തുടരെ ആശുപത്രി സന്ദർശിക്കൽ, വ്യാജ രോഗലക്ഷണങ്ങൾ ഉണ്ടാക്കൽ, ടെസ്റ്റ് ഫലങ്ങളിൽ വ്യതിയാനങ്ങൾ വരുത്താൻ ശ്രമിക്കൽ (ഉദാഹരണം: സാമ്പിളുകൾ മാറ്റം വരുത്തുക), തെളിവു നിരത്തി പറഞ്ഞാലും താൻ ചെയ്യുന്ന വഞ്ചന കഠിനമായി നിഷേധിക്കൽ തുടങ്ങിയവയാണ് രോഗലക്ഷണങ്ങൾ.

8 Ekbom Syndrome

 ദേഹമാകെ കീടങ്ങളും ചെറു ജീവികളും താവളമാക്കി എന്ന് കരുതുക. എന്നിട്ട് തലങ്ങും വിലങ്ങും ചൊറിഞ്ഞും മാന്തിയും കൊണ്ടിരിക്കുക. യഥാർത്ഥത്തിൽ ഒന്നുമില്ലാതാനും. വല്ലാത്ത സൂക്കേട് തന്നെ. ഓർക്കാൻ സൂചന കിട്ടുന്ന വേറൊരു പേരു പറയാം:- Delusional Parasitosis. പുറംലോകത്ത് അധികമാർക്കും അറിയാത്ത ഇങ്ങനെയുള്ള അനവധി ആന്തരിക ആധികളുമായി പലരും മല്ലടിക്കുന്നുണ്ട്. എല്ലാത്തിനും അതിനനുസൃതമായ ചികിത്സയും ഉണ്ട്.