"അന്ത്യനാളിൻ്റെ അടയാളങ്ങളിൽ ഒന്നാമത്തെത് എന്താണ്? സ്വർഗവാസികൾക്ക് ആദ്യമായി ഭക്ഷിക്കാൻ ലഭിക്കുന്നതെന്താണ്? ഒരു കുട്ടി മാതാവിനോടോ പിതാവിനോടോ സാദൃശ്യമാകുന്നത് (ആണോ പെണ്ണോ ആകുന്നത്) എന്തുകൊണ്ടാണ്?"
ചോദ്യങ്ങൾ തിരുനബിയോടാണ്. ചോദിക്കുന്നത് ഹുസൈൻ ബ്നു സലാം, അറിയപ്പെട്ട ജൂത പുരോഹിതൻ. ജൂതന്മാർ വിവിധ വിഭാഗങ്ങൾ ഉണ്ടെങ്കിലും എല്ലാവർക്കുമിടയിൽ സർവസമ്മതൻ. സത്യസന്ധൻ. അദ്ദേഹം സമയത്തെ മൂന്നാക്കി ഭാഗിച്ചിരുന്നു: ആരാധനക്കും ഉപദേശങ്ങൾക്കും ഒരു ഭാഗം, കാർഷികവൃത്തിക്ക് മറ്റൊരു ഭാഗം, വേദപഠനത്തിനും മനനത്തിനും മറ്റൊരു സമയം.
ഒരു പ്രവാചകൻ വരാനുള്ള വിവരം വേദങ്ങളിൽ പരാമർശിക്കുന്നത് അദ്ദേഹം ശ്രദ്ധിച്ചിരുന്നു. ആ പ്രവാചകൻ വരാനുള്ള സമയമായിട്ടുണ്ടെന്ന് അദ്ദേഹം മനസ്സിലാക്കുകയും ചെയ്തു. ആയിടെയാണ് മക്കയിൽ ഒരാൾ പ്രവാചകത്വം വാദിക്കുന്നതായി അറിയാനിടയായത്. അടയാളങ്ങളുമായി ഒത്തുനോക്കുമ്പോൾ അത് പ്രവചിക്കപ്പെട്ട നബി തന്നെ ആകാനാണ് സാധ്യത. അദ്ദേഹം മദീനയിലേക്ക് വരുമെന്ന് വേദങ്ങളിൽ പറഞ്ഞിട്ടുണ്ട്. മദീനയിലേക്ക് വരുമ്പോഴേക്കും താൻ മരിച്ചുപോകുമോ എന്ന ഭയം ഹുസൈനെ വേട്ടയാടിയിരുന്നു. ആ പ്രവാചകനെ കാണണം, വിശ്വസിക്കണം. അതിനായി അദ്ദേഹം പ്രാർഥിച്ചു കാത്തുപാർത്തു കഴിഞ്ഞു.
ഒരു ദിവസം ഈന്തപ്പനയിൽ കയറി കാർഷിക വൃത്തിയിൽ ഏർപ്പെട്ടുകൊണ്ടിരിക്കുകയാണ് ഹുസൈൻ. അപ്പോഴാണ് ആ വിവരം അറിഞ്ഞത്: "മദീനയിലേക്ക് പ്രവാചകൻ മുഹമ്മദ് വന്നിരിക്കുന്നു!" കേട്ടതും ഈത്തപ്പനയുടെ മുകളിൽ നിന്ന് "അല്ലാഹു അക്ബർ" എന്ന് അദ്ദേഹം ഉറക്കെ വിളിച്ചുപറഞ്ഞു. മരച്ചുവട്ടിൽ തൻ്റെ അമ്മായി ഖാലിദ: ഉണ്ടായിരുന്നു.
അമ്മായി: "കഷ്ടം! ഇനി മൂസാപ്രവാചകൻ വന്നാൽ നീ എന്താണ് പറയുക! നമുക്ക് മൂസയെക്കാൾ വലിയ ആളുണ്ടോ?"
ഇബ്നു സലാം: "മൂസാപ്രവാചകൻ്റെ അതേ സന്ദേശവുമായി വന്ന മറ്റൊരു പ്രവാചകനാ”
അമ്മായി: "മൂസയുടെ കിതാബിനെ ശരിവെച്ചു കൊണ്ട് കടന്നുവരുന്ന ഒരു പ്രവാചകനെക്കുറിച്ച് നിങ്ങൾ പറയാറുണ്ടല്ലോ, അദ്ദേഹമാണോ?"
ഇബ്നു സലാം: "അതെ, തീർച്ചയായും"
പിന്നെ താമസിച്ചില്ല. തിരുനബിയെ കാണാൻ ചെന്നു. തൗറാതിൽ വിവരിച്ച എല്ലാവിധ ലക്ഷണങ്ങളും ഒത്തിണങ്ങിയ മുഖം. പ്രവാചകൻ കൂടെയുള്ളവർക്ക് ക്ലാസ് എടുത്തുകൊണ്ടിരിക്കുകയാണ്. താൻ അടുത്തുചെന്നിരുന്നു. തിരുനബി അനുചരരോട് സാരോപദേശം നടത്തുകയാണ്: "ജനങ്ങളേ, അഭിവാദ്യം ചെയ്യൽ (സലാം) വ്യാപകമാക്കുവിൻ. മനുഷ്യർക്ക് അന്നം നൽകുവിൻ. ആളുകൾ ഉറങ്ങുമ്പോൾ എഴുന്നേറ്റു നിന്ന് നിസ്കരിക്കുവിൻ"
തിരുനബി: "എന്താ പേര്?"
ഹുസൈൻ: "ഹുസൈൻ ബ്ൻ സലാം"
തിരുനബി: "അല്ല; അബ്ദുല്ലാഹിബിനു സലാം"
ഹുസൈൻ: "ആയിക്കോട്ടെ; എന്നാൽ അങ്ങനെയാക്കാം"
അപ്പോഴാണ് അദ്ദേഹം മുകളിൽ കൊടുത്ത ചോദ്യങ്ങൾ ചോദിക്കുന്നത്. തിരുനബി എല്ലാറ്റിനും മറുപടി പറഞ്ഞു: "ജനങ്ങളെ പടിഞ്ഞാറു ഭാഗത്തുനിന്ന് കിഴക്ക് ഭാഗത്തേക്ക് തെളിച്ചു കൊണ്ടുപോകുന്ന അഗ്നിയാണ് അന്ത്യനാളിൻ്റെ ഒന്നാമത്തെ അടയാളം. സ്വർഗക്കാർ കഴിക്കുന്ന ആദ്യഭക്ഷണം മത്സ്യത്തിൻ്റെ കരളിൻ്റെ അറ്റത്ത് വേറിട്ട് നിൽക്കുന്ന സവിശേഷമായ ഭാഗമാണ്.”
ലിംഗനിർണയം സംബന്ധിച്ച് തിരുനബിയുടെ മറുപടി: "പുരുഷ സ്വഭാവമുള്ള സ്രവം (മാഉ റജുൽ) മികച്ചുനിന്നാൽ കുട്ടി ആണാവുകയും സ്ത്രീ സ്വഭാവമുള്ള സ്രവം (മാഉൽ മർഅ:) മുൻകടന്നാൽ കുഞ്ഞ് പെണ്ണാവുകയും ചെയ്യും".
പുരുഷബീജത്തിലെ X ക്രോമസോം (മാഉൽ മർഅ ) സ്ത്രീ അണ്ഡവുമായി ചേരുമ്പോൾ പെൺകുട്ടിയും പുരുഷബീജത്തിലെ Y (മാഉ റജുൽ) ക്രോമസോം അണ്ഡവുമായി യോജിക്കുമ്പോൾ ആൺകുട്ടിയുമായിരിക്കും എന്ന, വളരെ അടുത്ത കാലത്ത് കണ്ടെത്തിയ ശാസ്ത്ര സത്യത്തിലേക്ക് വെളിച്ചം വീശുന്നുണ്ട് തിരുനബിയുടെ ഈ വചനം.
മൂന്ന് ചോദ്യത്തിനും ഉത്തരമായി. ഇതുകേട്ട് അബ്ദുല്ലാഹി ബ്നു സലാം പ്രഖ്യാപിച്ചു: "ആരാധനക്കർഹൻ അല്ലാഹു മാത്രം; പ്രവാചകൻ മുഹമ്മദ് അല്ലാഹുവിൻ്റെ ദൂതനുമാണെന്ന് ഞാൻ സാക്ഷ്യപ്പെടുത്തുന്നു"
തുടർന്ന് അദ്ദേഹം തിരുനബിയോട് പറഞ്ഞു: "ജൂതന്മാർ മഹാനുണയന്മാരാണ്. ഞാൻ അവർക്കിടയിൽ ഏറെ സ്വീകാര്യനാണ്. എന്നാൽ; ഞാൻ മുസ്ലിമായി എന്നറിഞ്ഞാൽ അവർ എന്നെ അപമാനിക്കും. അതുകൊണ്ട് അവരെ വിളിച്ച്, എന്നെക്കുറിച്ച് എന്താണ് അഭിപ്രായം എന്ന് ആദ്യം ചോദിച്ചു നോക്കൂ"
തിരുനബി ജൂതന്മാരെ വിളിച്ചുവരുത്തി: "ഇബ്നു സലാമിനെക്കുറിച്ച് നിങ്ങളുടെ അഭിപ്രായം എന്താണ്?" അവർ ഒന്നടങ്കം പറഞ്ഞു: "ഞങ്ങളുടെ നേതാവ്, ഞങ്ങളുടെ നേതാവിൻ്റെ മകൻ. ഞങ്ങളിൽ ഉത്തമൻ, ഞങ്ങളിൽ ഉത്തമൻ്റെ മകൻ. ഞങ്ങളിലെ പണ്ഡിതൻ, ഞങ്ങളിലെ പണ്ഡിതൻ്റെ മകൻ. കർമശാസ്ത്ര വിശാരദൻ, കർമശാസ്ത്ര വിശാരദൻ്റെ മകൻ"
തിരുനബി: "ഇബ്നു അബ്ദുസ്സലാം മുസ്ലിം ആയിട്ടുണ്ടെങ്കിൽ നിങ്ങൾ അദ്ദേഹത്തെ അംഗീകരിക്കുമോ?"
ജൂതന്മാർ: "മുസ്ലിമാകുന്നതിൽ നിന്ന് അല്ലാഹു അദ്ദേഹത്തെ കാക്കട്ടെ"
അപ്പോൾ അവർക്കിടയിലേക്ക് ഇബ്നു സലാം സത്യസാക്ഷ്യം മൊഴിഞ്ഞുകൊണ്ട് കടന്നുവന്നു. അപ്പോൾ അവർ ഒന്നടങ്കം പറഞ്ഞു: "അദ്ദേഹം ഞങ്ങളിൽ ഏറ്റവും മോശപ്പെട്ടവനാണ്, ഏറ്റവും മോശപ്പെട്ടവൻ്റെ മകനാണ്. ഏറ്റവും വലിയ വിഡ്ഢിയാണ്, വലിയ വിഡ്ഢിയുടെ മകനാണ്". "ഇതുതന്നെയാണ് ഞാൻ ഭയപ്പെട്ടിരുന്നത്"; അബ്ദുല്ലാഹി ബ്നു സലാം തിരുനബിയോട് പറഞ്ഞു.
ഇത്തരം ധാരാളം അനുഭവങ്ങൾ ഉണ്ടായിട്ടുണ്ട്. മറ്റൊരു സംഭവമിതാ.
തിരുനബിയുടെ ഭൃത്യനായിരുന്ന സൗബാൻ തിരുനബിയുടെ അടുക്കൽ നിൽക്കുകയായിരുന്നു. അപ്പോൾ ഒരു ജൂത പുരോഹിതൻ കടന്നുവന്നു. തിരുനബിയുടെ പേര് വിളിച്ചു, സലാം ചൊല്ലി. സൗബാനത് ഇഷ്ടപ്പെട്ടില്ല. അദ്ദേഹം അയാളെ ഒന്ന് തൊഴിച്ചു.
ജൂതൻ: "എന്തിനാണ് തന്നെ തൊഴിച്ചത്?"
സൗബാൻ: "നീയെന്താ തിരുനബിയുടെ പേര് വിളിച്ചത്? നിനക്ക് 'യാ റസൂലല്ലാഹ്' എന്ന് പറഞ്ഞുകൂടായിരുന്നോ?"
ജൂതൻ: "ഞാൻ അദ്ദേഹത്തിൻ്റെ വീട്ടുകാർ നൽകിയ പേരാണ് വിളിച്ചത്. അതിലെന്താണ് കുഴപ്പം?"
അപ്പോൾ തിരുനബി ജൂതൻ്റെ പക്ഷം ചേർന്നു! "ശരിയാ. എൻ്റെ വീട്ടുകാർ എനിക്കിട്ട പേര് മുഹമ്മദ് എന്ന് തന്നെയാണ്"
ജൂതൻ: "എനിക്ക് ഒരു ചോദ്യം ചോദിക്കാനുണ്ട്"
തിരുനബി: "ഞാൻ മറുപടി പറഞ്ഞാൽ നിനക്ക് വല്ല ഉപകാരവും ഉണ്ടാകുമോ?"
ജൂതൻ: "ഞാനെൻ്റെ രണ്ട് കാതുകൊണ്ടത് കേൾക്കും"
തിരുനബി ഒരു മരക്കഷണം കൊണ്ട് നിലത്ത് കുത്തിയ ശേഷം പറഞ്ഞു: "ചോദിക്കൂ..."
ജൂതൻ: "ഭൂമിയും ആകാശവും മറ്റൊന്നായി മാറ്റിമറിക്കപ്പെടുന്ന ദിവസത്തിൽ ജനങ്ങൾ എവിടെയായിരിക്കും?"
തിരുനബി: "പാലത്തിൻ്റെ ചുവട്ടിൽ, ഇരുട്ടത്ത്"
ജൂതൻ: "ആർക്കാണ് ആദ്യമായി സ്വർഗപ്രവേശത്തിന് അനുവാദം ലഭിക്കുക?"
തിരുനബി: "മുഹാജിറുകളിലെ ദരിദ്രർക്ക്"
ജൂതൻ: "സ്വർഗത്തിൽ പ്രവേശിക്കുമ്പോൾ ആദ്യമായി എന്താണ് ലഭിക്കുക?"
തിരുനബി: "മത്സ്യത്തിൻ്റെ കരളിൻ്റെ അറ്റത്തുള്ള സവിശേഷ ഭാഗം"
ജൂതൻ: "അതുകഴിഞ്ഞ് ഭക്ഷണമായി എന്ത് ലഭിക്കും?"
തിരുനബി: "സ്വർഗത്തിലെ കാളയെ അറുക്കുകയും അതിൻ്റെ കൈകാലുകളിൽ നിന്ന് അവർ ഭക്ഷിക്കുകയും ചെയ്യും"
ജൂതൻ: "അവരുടെ പാനീയം എന്തായിരിക്കും?"
തിരുനബി: "സൽസബീൽ"
ജൂതൻ: "നീ പറഞ്ഞതെല്ലാം ശരിയാണ്. എനിക്കൊന്നുകൂടി ചോദിക്കാനുണ്ട്. അതിൻ്റെ ഉത്തരം പ്രവാചകർക്ക് മാത്രമേ അറിയുകയുള്ളൂ. അതിനുപുറമേ ഒന്നോ രണ്ടോ പേർക്ക് മാത്രം"
തിരുനബി: "പറഞ്ഞിട്ട് വല്ല കാര്യവുമുണ്ടോ?!"
ജൂതൻ: "ഞാനെൻ്റെ രണ്ട് ചെവികൊണ്ട് കേൾക്കും."
തിരുനബി: "ചോദിക്കൂ."
ജൂതൻ: "കുട്ടികൾ (ആൺ/പെൺ) ഉണ്ടാവുന്നത് എങ്ങനെയാണെന്നാണ് എനിക്ക് അറിയേണ്ടത്?"
തിരുനബി: "പുരുഷബീജം (മാഉറജുൽ) വെളുത്തതാണ്. സ്ത്രീയുടെ സ്രവം (മാഉൽ മർഅ:) മഞ്ഞയും". സ്ത്രീയും പുരുഷനും സംസർഗത്തിൽ ഏർപ്പെടുകയും അങ്ങനെ മനിയ്യു റജുൽ (പുരുഷ സ്വഭാവമുള്ള ബീജം - Y ക്രോമസോം ഉള്ളത്) മനിയ്യുൽ മർഅ:യെ (സ്ത്രീ സ്വഭാവം ഉള്ള ബീജത്തെ - x ക്രോമസോം ഉള്ളതിനെ) അതിജയിക്കുകയാണെങ്കിൽ കുട്ടി ആണാവും; തിരിച്ചാണെങ്കിൽ കുട്ടി പെണ്ണാകും.
ജൂതൻ: "നീ പറഞ്ഞത് സത്യമാണ്.. നീ പ്രവാചകൻ തന്നെയാണ്.."
തിരുനബി പറയുകയാണ്: "ഇദ്ദേഹം ചോദിച്ച ചോദ്യങ്ങൾക്കൊന്നും എനിക്ക് ഉത്തരം അറിയുമായിരുന്നില്ല. ഓരോ ചോദ്യസമയത്തും ഉത്തരം അല്ലാഹു അറിയിച്ചു തരുകയാണ് ചെയ്തത്"
ഈ ഉത്തരത്തിലെ രണ്ട് കാര്യങ്ങൾ കൂടുതൽ പഠനങ്ങൾക്ക് വിധേയമാക്കേണ്ടതാണ്. സ്ത്രീയുടെ സ്രവം എന്ന വെളിപ്പെടുത്തലാണ് അതിലൊന്ന്. സംസർഗ സമയത്തോ അല്ലാത്തപ്പോഴോ സ്ത്രീകളുടെ യോനിയിലൂടെ സ്രവിക്കുന്ന ഒരു സ്രവവും മഞ്ഞനിറത്തിൽ അല്ല. മാത്രവുമല്ല അവക്ക് കുഞ്ഞിൻ്റെ ജന്മവുമായി ഒരു ബന്ധവുമില്ല എന്നാണ് ആധുനികശാസ്ത്രം.
എന്നാൽ പുരുഷ ബീജത്തിൻ്റെ സ്ഥാനത്ത് സ്ത്രീയിൽ നിന്ന് സ്രവിക്കുന്നത് അണ്ഡമാണ്. ഈ സ്രവത്തിൻ്റെ നിറമെന്താണ്? മഞ്ഞ; കടും മഞ്ഞ! പുരുഷ ശുക്ലം തെറിച്ചു വീഴുകയാണ് (ദാഫിഖ്) ചെയ്യുന്നത്. അണ്ഡോത്പാദനത്തിൻ്റെ അവസാനഘട്ടത്തിൽ ഉത്പാദിപ്പിക്കപ്പെടുന്ന LH (ലൂറ്റിനൈസിംഗ് ഹോർമോൺ) അതിൻ്റെ പ്രവർത്തനമാരംഭിക്കുകയും ഫോളിക്കുളാർ ദ്രവത്തെ മഞ്ഞവൽക്കരിക്കുകയും ചെയ്യും. ഫോളിക്കിളിലെ സ്റ്റിഗ്മ പൊട്ടി അണ്ഡത്തോടെ പുറത്തേക്ക് തെറിക്കുന്ന ഫോളിക്കുളാർ ദ്രാവകത്തിൻ്റെ നിറം മഞ്ഞയായിരിക്കും. പുരുഷ ശുക്ലവുമായി താരതമ്യം ചെയ്യുമ്പോൾ കട്ടിയില്ലാത്തതും മഞ്ഞ നിറത്തിലുള്ളതുമായ ദ്രാവകമാണ് ഫോളിക്കിൾ പൊട്ടി പുറത്തേക്കൊഴുകുന്ന കുഞ്ഞിൻ്റെ നിർമാണത്തിന് നിമിത്തമാകുന്ന സ്ത്രീസ്രവം എന്നർഥം!
മഞ്ഞയെന്ന് അർഥം വരുന്ന ലൂറ്റിയസ് (Luteus) എന്ന ലാറ്റിൻ പദത്തിൻ്റെ നപുംസകരൂപമായ ലൂറ്റിയത്തിൽ (Luteum) നിന്നാണ് ലൂറ്റിനൈസ് (Luteinize) എന്ന ക്രിയയുണ്ടായിരിക്കുന്നത്. അതിൽനിന്നാണ് ലൂറ്റിനൈസിംഗ് ഹോർമോൺ എന്ന വാക്ക് ഉണ്ടായത്!
2008-ൽ ബെൽജിയത്തിൽ ഗർഭാശയം നീക്കം ചെയ്യാനുള്ള എൻഡോസ്കോപ്പി സർജറി ചെയ്യുന്നതിനിടയിൽ തികച്ചും ആകസ്മികമായി അണ്ഡാശയത്തിൽ നിന്ന് ഓവുലേഷൻ നടക്കുന്നത് ലോകത്ത് ആദ്യമായി ലൈവായി കാണാൻ ഇടയായി. അതിൻ്റെ ലിങ്ക് താഴെ കൊടുക്കുന്നു. ഓവേറിയൻ ഫോളിക്കിൾ പൊട്ടി മഞ്ഞ നിറത്തിലുള്ള ദ്രാവകം പുറത്തുവരുന്നത് ഇതിൽ വ്യക്തമായി കാണാവുന്നതാണ്.
2008 ജൂൺ 11-ന് BBC പുറത്തു വിട്ട വാർത്തയാണിത്: http://news.bbc.co.uk/2/hi/health/7447942.stm. 2008-ൽ മാത്രം കണ്ട് ബോധ്യപ്പെട്ട കാര്യം എ.ഡി 630-കളിൽ എങ്ങനെയായിരിക്കും തിരുനബി പറഞ്ഞത്? പുരുഷ ബീജത്തിൽ തന്നെ ലിംഗ നിർണയ ക്രോമസോമുകൾ ഉണ്ടെന്നും അവയിലെ Y ക്രോമസോമാണ് (പുരുഷ സ്വഭാവമുള്ളത്) സ്ത്രീയുടെ X ക്രോമസോമമായി ചേരുന്നതെങ്കിൽ കുട്ടി ആണാകുമെന്നും, X ക്രോമസോമാണ് സ്ത്രീയുടെ X ക്രോമസോമുകളായി ചേരുന്നതെങ്കിൽ കുട്ടി പെണ്ണായിരിക്കുമെന്നും ഭ്രൂണശാസ്ത്രം പറയുന്നു. മനിയ്യിൽ തന്നെ (സ്രവിക്കപ്പെടുന്ന പുരുഷ ബീജം) ആൺ/പെൺ ക്രോമസോമുകൾ വഹിക്കുന്ന ബീജം ഉണ്ടെന്നും അവയുടെ മത്സരത്തിൽ ആരാണ് വിജയിക്കുന്നത് എന്നതിനനുസരിച്ച് ആണും പെണ്ണും ആകുമെന്നുമാണ് ശാസ്ത്രമതം. അതുതന്നെയല്ലേ തിരുനബിയും 1400 വർഷങ്ങൾക്കുമുമ്പ് പറഞ്ഞത്?
വിഗ്രഹവും ജിന്നുകളും വേദപണ്ഡിതരും അവിടുത്തെ പ്രവാചകത്വം സ്ഥിരപ്പെടുത്തിയല്ലോ. ശാസ്ത്രം മാത്രം മാറിനിൽക്കുന്നത് എന്തിനാണ്? ഭ്രൂണശാസ്ത്രവുമായി ബന്ധപ്പെട്ട ഒരുപാട് അത്ഭുതങ്ങൾ തിരുനബിക്ക് അവതരിച്ച ഖുർആനിൽ തന്നെയുണ്ട്.
