ഒട്ടിപ്പിടിച്ച നിലയിൽ ജനിക്കുന്ന സയാമീസ് ഇരട്ടകളുടെ അനന്തരാവകാശ നിയമങ്ങൾ എങ്ങനെയായിരിക്കും എന്ന് നോക്കാം.
ഈ വിഷയത്തിൽ ആദ്യം ഉയരുന്ന അടിസ്ഥാനചോദ്യം, ഒട്ടിപ്പിടിച്ച ഇരട്ടകൾ രണ്ട് വ്യത്യസ്ത വ്യക്തികളാണോ, അല്ലെങ്കിൽ ഒരു വ്യക്തിയുടെ അധിക അവയവങ്ങളായി കണക്കാക്കേണ്ടവരാണോ എന്നതാണ്. രണ്ട് മുഖങ്ങളും രണ്ട് തലകളും ഉള്ള വ്യക്തികളുടെ വുളൂഅ് (അംഗശുദ്ധീകരണം), കുളി തുടങ്ങിയ കാര്യങ്ങളെക്കുറിച്ചും കർമശാസ്ത്ര ഗ്രന്ഥങ്ങളിൽ വിശദീകരണങ്ങൾ കാണാം.
ഇരട്ടകൾ രണ്ട് വ്യത്യസ്ത വ്യക്തികളാണോ എന്ന് തിരിച്ചറിയാൻ പണ്ഡിതന്മാർ ചില മാനദണ്ഡങ്ങൾ പരാമർശിച്ചിട്ടുണ്ട്. അവ സംക്ഷിപ്തമായി ഇങ്ങനെ വിശദീകരിക്കാം:
ഒട്ടിപ്പിടിച്ച ശരീരങ്ങൾക്ക് വ്യത്യസ്തമായ ജീവപ്രവർത്തനങ്ങളും പ്രതികരണങ്ങളും ഉണ്ടോ എന്ന് പരിശോധിക്കണം. ഉദാഹരണത്തിന്, ഒരാൾ ഉറങ്ങുമ്പോൾ മറ്റെയാൾ ഉണർന്നിരിക്കുന്നു, ഒരാൾ മിണ്ടാതിരിക്കുമ്പോൾ മറ്റെയാൾ സംസാരിക്കുകയോ ചിരിക്കുകയോ കരയുകയോ ചെയ്യുന്നു. ഇതു പോലുള്ള വ്യത്യസ്ത ജീവലക്ഷണങ്ങൾ പ്രകടമാകുന്നുവെങ്കിൽ, അവർ രണ്ട് വ്യത്യസ്ത വ്യക്തികളാണെന്ന് മനസ്സിലാക്കാം.
അതേസമയം, രണ്ട് തലകളും നാല് കൈകളും ഉണ്ടായാലും, ഒരുമിച്ചാണ് ഉറങ്ങുന്നതും ഉണരുന്നതും ചിരിക്കുന്നതും കരയുന്നതുമെങ്കിൽ, അവരെ ഒരു വ്യക്തിയുടെ അധിക അവയവങ്ങളായി പരിഗണിക്കും. മറ്റു ശരീരഭാഗങ്ങൾ പൂർണമായി ഇരട്ടരൂപത്തിൽ ഇല്ലെങ്കിലും, രണ്ട് തലകളും അവയിൽ ഓരോന്നും വ്യത്യസ്തമായ ജീവന്റെ ലക്ഷണങ്ങളും ബോധപ്രതികരണങ്ങളും പ്രകടിപ്പിക്കുന്നുണ്ടെങ്കിൽ, അവരെ രണ്ട് വ്യക്തികളായും പരിഗണിക്കണം.
ഇങ്ങനെ, ഒട്ടിപ്പിടിച്ച ഇരട്ടകളെ രണ്ട് വ്യക്തികളായി കണക്കാക്കുന്ന സാഹചര്യത്തിൽ, അനന്തരാവകാശ നിയമങ്ങളിലും അവർക്ക് രണ്ട് വ്യക്തികളുടെ അവകാശവും പരിഗണനയും ഉണ്ടായിരിക്കും. ഉദാഹരണത്തിന്, ഒട്ടിപ്പിടിച്ച ഇരട്ടകൾ പരേതന്റെ പെൺമക്കളാണെന്നും, കൂടെ മറ്റൊരു സഹോദരിയോ ഇല്ലെന്നും കരുതിയാൽ, അവർക്ക് ചേർന്ന് മൂന്നിൽ രണ്ട് (2/3) ഓഹരി ലഭിക്കും. അതുപോലെ, മരണപ്പെട്ട വ്യക്തിയുടെ ഉമ്മയ്ക്ക് സാധാരണയായി ലഭിക്കേണ്ട 1/3 ഓഹരി 1/6 ആയി കുറയാനും കാരണമാവും.
